Llista de centrales hidroeléctriques más grandes del mundu
artículu de llista de Wikimedia / From Wikipedia, the free encyclopedia
Esti artículu recueye les centrales hidroeléctriques más grandes del mundu, incluyendo namái aquelles centrales hidroeléctriques con una capacidá de xeneración que supere los 1.000 MW (megavatio).
El complexu de la Presa de les Tres Foces, na provincia de Hubei, en China, tien la mayor capacidá de xenerar enerxía del mundu, anque la central de Itaipú xenera, nuna sola presa, la mayor lletricidá del mundu. El complexu chinu inclúi dos centrales de xeneración: la presa de les Tres Foces (22.500 MW) y la presa Gezhouba (2.715 MW) nel añu 2009; la capacidá total de xeneración d'esti complexu algamaría los 25.615 MW. En 2008, esti complexu xeneró 97,9 TWh de lletricidá (80,8 TWh de la presa de les Tres Foces y 17,1 TWh de la presa Gezhouba).
La central hidroeléctrica d'Itaipú, alcontrada na frontera ente Brasil y Paraguái, tien anguaño la más alta producción d'enerxía hidroeléctrica del mundu nuna sola presa. Con 20 unidaes de xeneración y 14.000 MW de capacidá instalaos, en 2013 la central hidroeléctrica de Itaipú algamó un nuevu récor históricu na producción d'enerxía llétrica al algamar los 98,6 TWh. Ye importante recordar qu'anque una central hidroeléctrica pueda tener una capacidá de xeneración d'enerxía realmente grande (xeneradores) tamién precisa que la corriente fluya de manera siguida a lo llargo del añu, como asocede na presa de Itaipú.
El complexu del ríu Jinsha (la cabecera cimera del ríu Yangtsé) ye potencialmente'l sistema de xeneración hidroeléctrica mayor del mundu anguaño en construcción. Tien tres fases:
- la fase I, qu'inclúi cuatro preses nel cursu inferior del ríu Jinsha: la presa Wudongde, la presa Baihetan, la presa Xiluodu y la presa Xiangjiaba, con una capacidá de xeneración de 7.400 MW, 14.000 MW, 12.600 MW y 6.000 MW respeutivamente. La capacidá xeneradora total d'estos cuatro preses ye de 40.000 MW. La construcción de la presa de Xiluodu empezó'l 26 d'avientu del añu 2005 y la de presa de Xiangjiaba el 26 de payares de 2006. La fase I créese que va terminar en 2015;
- la fase II, qu'inclúi ocho preses nel cursu mediu del ríu Jinsha, con una capacidá xeneradora total de 21.150 MW;
- la fase III, qu'inclúi ocho preses nel cursu cimeru del ríu Jinsha, con una capacidá xeneradora total de 8.980 MW.
La capacidá total combinada del complexu de Jinsha col complexu de les Tres Foces va ser de 95.745 MW.