先天定後天
From Wikipedia, the free encyclopedia
先天定後天(粵拼:sin1 tin1 ding6 hau6 tin1;英文:nature versus nurture)係廿世紀心理學同相關領域上嘅一場爭論[註 1][1]:就算到咗廿世紀,有好多學者都堅持認為人嘅心靈係「本來好似張白紙噉嘅」-佢哋主張人嘅心靈响出世嗰陣係乜都冇嘅,而個人跟住落嚟喺智能等心理特性上嘅發育完全由環境同教育主宰;不過另一方面,又有好多人主張心理特性係由遺傳因素話事嘅。於是乎學界就掀起咗一場辯論[2][3]:
「 | 」 |
為咗解答呢條問題,廿世紀嘅心理學界做咗好多實證研究,當中最出名嘅係孖胎研究:孖胎有得分做同卵同異卵兩種,前者指兩個嚟自同一粒受精卵,而後者指兩個嚟自兩粒唔同嘅受精卵;喺前者嗰種情況下,兩兄弟或者兩姊妹嘅基因係完全一樣咁滯[4],而喺後者嗰種情況下,兩兄弟姊妹嘅基因得嗰 50% 左右相同;簡化噉講,心理學家可以睇吓因為父母離婚等嘅原因而分開成長-環境唔同-會點樣影響一對孖胎之間嘅心理特性相似度,想像家陣有一個心理特性,研究發現分開成長完全唔會影響一對同卵孖胎之間喺個特性上嘅相似度,噉就有理由信呢個特性係主要受遺傳因素主導嘅[5][6]。
呢啲研究嘅結果係,廿世紀心理學有睇嗰啲心理特性幾乎冚唪唥都會受遺傳因素影響:遺傳度[歐 1]係一個可以由孖胎研究嗰度搵到嘅數值,一個遺傳度數值會喺 0 同 1 之間,近 0 表示個體之間喺個特性上嘅差異近乎完全係源於環境因素,近 1 表示個體喺個特性上嘅差異近乎完全係源於遺傳因素;有好多重要嘅心理特性嘅遺傳度都有返咁上下大[7],例如「成年期嘅 IQ」遺傳度估計就有成 60 至 80% 咁高[8]。到咗廿一世紀初,心理學界基本上有嗮共識-絕大多數嘅心理特性都係受制於遺傳因素嘅,不過環境同教育依然可以或多或少噉有一啲影響[6]。