極光
From Wikipedia, the free encyclopedia
極光(粵拼:gik6 gwong1;英文:aurora / polar lights)係一種自然現象,指喺地球高緯度地區(極地)嘅天嗰度有陣時會見到嘅一種五顏六色嘅光,可以有好多種結構,包括帶形、弧形、幕形同放射形等。極光喺地球南極同北極都可以見到[1],南極嘅極光係南極光(southern lights,拉丁文係 aurora australis [2]),而北極嘅極光就係北極光(nothern lights,拉丁文係 aurora borealis [3])。
極光源於太陽風(solar wind)對地球大氣層磁層(magnetosphere)嘅干擾:太陽時不時會射出一啲帶電粒子(帶電荷嘅粒子)去佢周圍嘅太空嗰度;呢啲粒子有一部份會飛向地球,地球個磁場會令射埋佢嗰度嘅帶電粒子傾向飛去兩極;同時,好多氣體嘅粒子喺受到電磁干擾而離子化或者活躍化嗰陣,會發出唔同色水同款嘅光[4][5];因為噉,每當太陽活躍,造成勁嘅太陽風嗰時,好多時會搞到地球兩極上空嘅大氣層嘅粒子受到強烈嘅電磁干擾,會形成極光,極光嘅色同款就視乎是次太陽風活動涉及邊啲種類嘅粒子[1][3]。
自古以嚟,極光就一路引起人類嘅種種遐想。好似係北歐神話入面有傳說,話極光係女武神(valkyrie)嘅盾同護甲所反射嘅光:古代嘅維京人相信,女武神係一班女神,職責係幫眾神之父奧丁(Odin)將打仗戰死嘅勇士帶去英靈殿;俾女武神睇中係一種極高嘅榮譽-北歐神話相傳,俾女武神睇中嘅勇士會喺英靈殿嗰度受女武神嘅款待,而喺諸神黃昏(挪威文:Ragnarök)嗰陣,一眾英靈殿嘅勇士就會同奧丁以及眾神一齊上陣作戰[6]。到咗廿一世紀,地球科學等嘅科學領域經已對極光嘅真正來源有咗詳細嘅了解,但極光嘅姿態依然引起世人嘅讚嘆,有好多人會為咗睇極光而專登去北歐等地旅行[7]。