學術寫作
From Wikipedia, the free encyclopedia
學術寫作(粵拼:hok6 seot6 se2 zok3;英文:academic writing)係一種冇虛構性質嘅寫作,泛指寫嚟講學術嘢嘅文字作品。學術寫作有得細分做好多類-包括係寫嚟做理論型探究嘅文、寫嚟匯報一份實驗嘅結果嘅文、或者係攞檔案嚟做分析嘅文... 呀噉。呢啲咁多唔同嘅文字作品組成咗所謂嘅學術文獻-學術文獻嘅存在令到學術工作者有得彼此交流自己嘅諗頭,係學術研究不可或缺嘅一環[1][2]。
對於從事學術工作嘅人嚟講,學術寫作係一樣好緊要嘅技能:
- 科學領域嘅研究者(科學家)需要例如寫報告,同人解釋自己做嘅實驗或者提倡嘅理論[3];
- 工程學領域嘅研究者都要寫文,同人解釋例如自己件發明係點運作嘅,或者件發明可以攞嚟有咩用[4];
- 人文學領域嘅研究者都係要寫文,例如分析某一份文學作品或者一首樂曲(人文學成日做啲噉嘅研究)呀噉[5]。
因為學術寫作咁緊要,有啲學術工作者甚至仲撰文,同啲同行傾點樣先可以有效噉做學術寫作同埋教學生做學術寫作[2]。亦都有學術工作者會對學術文獻做社科研究,剖析「唔同領域嘅學者寫起嘢上嚟有咩分別」以及「邊啲寫作方式能夠更有效噉促進諗頭嘅交流」噉嘅問題[6]。