Independencia de Méxicu
From Wikipedia, the free encyclopedia
La Independencia de Méxicu foi la consecuencia d'un procesu políticu y social resueltu pela vía de les armes, que punxo fin al dominiu español nos territorios de Nueva España. La guerra pola independencia mexicana estendióse dende'l Grito de Dolores, el 16 de setiembre de 1810, hasta la entrada del Exércitu Trigarante a la Ciudá de Méxicu, el 27 de setiembre de 1821.
Independencia de Méxicu | ||||
---|---|---|---|---|
Parte de guerres d'independencia hispanoamericanes | ||||
Dende la parte cimera del collage a la izquierda: Miguel Hidalgo, José María Morelos, Abrazu d'Acatempan ente Agustín de Iturbide y Vicente Guerrero, Exércitu Trigarante en Ciudá de Méxicu y Mural de la independencia d'O'Gorman. | ||||
Fecha | 16 setiembre 1810 → 27 setiembre 1821 | |||
Llugar | América del Norte | |||
Resultáu | Independencia de Méxicu pola robla del Acta d'Independencia del Imperiu Mexicanu | |||
Belixerantes | ||||
| ||||
Comandantes | ||||
| ||||
[editar datos en Wikidata] |
El movimientu independentista mexicanu tien como marcu la Ilustración y les revoluciones lliberales de la última parte del sieglu XVIII. Por esa dómina la élite ilustrada empezaba a cavilgar alrodiu de les rellaciones d'España coles sos colonies. Los cambeos na estructura social y política derivaos de les reformes borbóniques, a los que se sumó una fonda crisis económica en Nueva España, tamién xeneraron un maltar ente dellos segmentos de la población.
La ocupación francesa de la metrópolis en 1808 desencadenó en Nueva España una crisis política que desaguó nel movimientu armáu. Nesi añu, el rei Carlos IV y Fernandu VII abdicaron socesivamente en favor de Napoleón Bonaparte, que dexó la corona d'España al so hermanu Xosé Bonaparte. Como respuesta, el conceyu de Méxicu —con sofitu del virréi José de Iturrigaray— reclamó la soberanía n'ausencia del rei llexítimu; la reaición condució a un golpe d'Estáu contra'l virréi y llevó a la cárcel a los cabezaleros del movimientu.
A pesar de la derrota de los criollos na Ciudá de Méxicu en 1808, n'otres ciudaes de Nueva España axuntáronse pequeños grupos de conxuraos que pretendieron siguir los pasos de Méxicu. Tal foi'l casu de la conxura de Valladolid de 1809 y los participantes de la cual fueron puestos en prisión. En 1810, los conspiradores de Querétaro tuvieron a piques de correr la mesma suerte pero, al vese descubiertos, optaron por tomar les armes el 16 de setiembre en compañía de los habitantes indíxenes y llabradores del pueblu de Dolores (Guanajuato), convocaos pol cura Miguel Hidalgo y Costilla.
De magar 1810, el movimientu independentista pasó delles etapes, pos los socesivos líderes fueron puestos en prisión o executaos poles fuercies lleales a España. De primeres reivindicábase la soberanía de Fernandu VII sobre España y les sos colonies, pero los líderes asumieron dempués postures más radicales, incluyendo cuestiones d'orde social como l'abolición de la esclavitú. José María Morelos y Pavón convocó a les provincies independentistes a conformar el Congresu d'Anáhuac, que dotó al movimientu insurxente d'un marcu llegal propiu. Tres la derrota de Morelos, el movimientu amenorgóse a una guerra de guerrilles. Escontra 1820, namái quedaben dellos nucleos rebalbos, sobremanera na sierra Madre del Sur y en Veracruz.
La rehabilitación de la Constitución de Cádiz en 1820 afaló'l cambéu de postura de les élites novohispanes, qu'hasta esi momentu sofitaren el dominiu español. Al ver afeutaos los sos intereses, los criollos monarquistes decidieron sofitar la independencia de Nueva España, pa lo cual buscaron aliase cola resistencia insurxente. Agustín de Iturbide dirixó'l brazu militar de los conspiradores, y a entamos de 1821 pudo atopase con Vicente Guerrero. Dambos proclamaron el Plan d'Iguala, que convocó a la xuntura de toles faiciones insurxentes y cuntó col sofitu de l'aristocracia y el cleru de Nueva España. Finalmente, la independencia de Méxicu algamóse'l 27 de setiembre de 1821.
Tres ello, Nueva España convirtióse nel Primer Imperiu Mexicanu, una efímera monarquía católica que dio pasu a una república federal en 1823, ente conflictos internos y la xebra de les Provincies Xuníes d'América Central.
Dempués de dalgunos intentos de reconquista, incluyendo la espedición d'Isidro Barradas en 1829, España reconoció la independencia de Méxicu en 1836, tres el fallecimientu del monarca Fernandu VII.