Nilón
From Wikipedia, the free encyclopedia
El nilón[1] o nailon[2] (de la marca comercial rexistrada: nylon®) ye un polímeru artificial que pertenez al grupu de les poliamides. Xenérase formalmente por policondensación d'un diácidu con una diamina. La cantidá d'átomos de carbonu nes cadenes de la amina y del ácidu pue indicase darrera de les iniciales de poliamida. El más conocíu, el PA6.6 ye polo tanto'l productu formal del ácidu hexanodioicu (ácidu adípicu) y la hexametilenodiamina.
Por razones práutiques nun s'utiliza l'ácidu y l'amina, sinón soluciones de l'amina y del cloruru del diácidu. Ente los dos fases, fórmase'l polímeru que pue ser espandíu pa dar el filu de nilón.
Un polímeru paecíu ye'l perlón que se forma por apertura y polimerización d'una lactama, xeneralmente la caprolactama. La diferencia ta en que nel nilón les cadenes tán formaes por polímeros de la fórmula de xeneral ( ..-NH-C(=O)-(CH2)n-C(=O)-NH-(CH2)m-...) ente que nel perlón les cadenes tienen la secuencia ( ..-NH-C(=O)-(CH2)n-NH-C(=O)-(CH2)n-...).
El descubridor del nilón y quien lu patentó de primeres foi Wallace Hume Carothers. El descubrimientu foi'l día 28 de febreru de 1935, pero nun foi patentáu hasta'l 20 de setiembre de 1938 (U.S. Patents 2130523, 2130947 et 2130948). A la muerte d'ésti, la empresa DuPont caltuvo la patente. Los Llaboratorios DuPont, en 1938, produxeron esta fibra sintética fuerte y elástica, que trocaría en parte a la seda y el rayón.
El nilón ye una fibra testil elástica y resistente, nun lu ataca'l virugu, nun precisa plancháu y utilízase na confección de medies, texíos y teles de puntu, tamién cerdes y sedales. El nilón moldiáu utilízase como material duro na fabricación de diversos instrumentos, como mangos de cepiyos, peñes, etc.
Con esti inventu, revolucionóse en 1938 el mercáu de les medies, cola fabricación de les medies de nilón, pero llueu fixéronse bien difíciles de consiguir, porque al añu siguiente los Estaos Xuníos entraron na Segunda Guerra Mundial y el nilón foi necesariu pa faer material de guerra, como cuerdes y paracaíes. Pero enantes de les medies o de los paracaíes, el primer productu de nilón foi'l cepiyu de dientes con cerdes de nilón. Les primeres partíes llegaron a Europa en 1945.