Лісоўчыкі
From Wikipedia, the free encyclopedia
Лісоўчыкі — назва нерэгулярных падразьдзяленьняў лёгкай кавалерыі Рэчы Паспалітай у 1608—1630-х гадах. Атрымалі назву ад свайго першапачатковага кіраўніка Аляксандра Язэпа Лісоўскага — таленавітага военачальніка, беларускага шляхціча зь Віленшчыны[1][2]. Прымалі ўдзел у вайне Рэчы Паспалітай з Масковіяй, Трыццацігадовай вайне, у бітвах супраць туркаў-асманаў. Тагачасныя гістарычныя крыніцы характарызуюць іх надзвычай спрытнымі, ваяўнічымі і крыважэрнымі.
У адрозьненьне ад рэгулярных падразьдзяленьняў коньніцы, паслугі лісоўчыкаў не аплочваліся жалаваньнем са скарбу Рэчы Паспалітай. Таму лісоўчыкаў наймалі, даючы ім права здабыцьця ваенных трафеяў, якія былі іхняй адзінай аплатай за службу. Заслужылі страх і пагарду цывільнага насельніцтва, сумнеўна праславіўшыся колькасьцю ўчыненых імі гвалтаў (рабаваньні, згвалтаваньні, забойствы і іншыя). Аднак былі паважаныя супернікамі за высокае баявое майстэрства.
Лісоўчыкі ваявалі манэўрана, не цягалі за сабой абозу, не накоплівалі ўмацаваных табараў. Паводле ўзбраеньня яны адносіліся да казакоў ці татараў (мінімум засьцерагальных дасьпехаў, лук, стрэльба, шабля, сагайдак). Вербаваліся з дабраахвотнікаў — дробнай шляхты і мяшчан ВКЛ.
Ня грэбавалі нават рабаваньнем на землях уласнай дзяржавы. Таму польскі кароль Жыгімонт III стараўся трымаць іх як мага далей ад Рэчы Паспалітай. У рэшце рэшт лісоўчыкі былі распушчаныя ў 1635 годзе.