Antîc Egjit
From Wikipedia, the free encyclopedia
Cu la peraule Antîc Egjit si intint le civiltât svilupade intor a lis tieris fertilis dongje dal flum Nîl a scomenç da lis cataratis, dongje il confin cul Sudan, fin ae viertidure cul Mâr Mediterani in timps incredibilmentri lontans, a scomençâ dal 3300 p.d.C, fin al 343 p.d.C, cuant al piert le sô indipendence par man dai Romans.
Al è stât calcolât che la agricolture in chestis tieris e je praticade a scomençâ dal 6000 p.d.C. e je propit la presince dal flum a rindi pussibil la vite e lis coltivazions in une tiere pluitost desertiche, al è il motôr de civiltât che vivarà par tre mil agns, scuasit cence gambiaments. Lis aghis dal Nîl, cu lis lôr plenis, a puedin puartâ fertilitât, ma ancje distruzion, se no vegnin controladis in mût costant, e metudis vie par i periodis di sicitât. Al è par chest motîf che si sint le bisugne di un stât organizât, un stât che al puedi garantî la manutenzion di chês oparis di cui dipent la vite di ducj.
La bisugne di vê un stât che ministre lis oparis publichis (stuons e canâi), colegâts al Nîl, al puarte a la nassite di un dai prins stâs de storie, in tal 3300 p.d.C. I oms de lis tieris dal Nîl a imparin daurman a vivi sot le autoritât di un sorestant (periodi de formazion dai distrets). I distrets si dan cuintri e si alein jenfri di lôr par scuasit mîl agns, fint ae creazion di doi reams, l'Alt Egjit, in te basse, costituît de bande meridionâl de Vâl dal Nîl, e il Bâs Egjit, costituît de viertidure dal flum, che a vegnin unificâts in tal 3000 p.d.C., de bande di Menes, (scuasit di sigûr il faraon Narmer) re dal Alt Egjit, che al sarâ il primarûl da lis 30 dinastiis dal antîc Egjit. Jenfri i monuments pui cognossûts, a son di sigûr lis piramidis, tombis dai rês de III ae XII dinastie.
Lis piramidis pui famosis si cjatin a Giza, dongje la citât dal Cairo, la capitâl di vuê.
La lôr grandece e testemonie la fuarce de organizazion dal stât egjizian, e trop che i egjizians vevin a cûr il crodi dal al dilà.
Le Piramide dal faraon Cheope, clamade ancje Grande Piramide, tombe dal faraon Khufu, cognossût cul non di Cheope e je le piramide conservade plui ben.
L'antîc Egjit jont il massim de sô fuarce e estension teritoriâl in tal periodi clamât Gnûf Ream (1567 p.d.C - 1085 p.d.C-), cuant che i confins dal imperi rivavin fin ae Libie, ae Etiopie e a lis tieris dal Orient di Mieç.
L'antîc Egjit al à cognossût ancje periodis di debolece e mancjance dal podê, come che al è sucedût in tai Periodis di Meçâns, cuant in tal seont l'Egjit ven invadût dal popul dai Hyksos.