Canadà
From Wikipedia, the free encyclopedia
Il Canadà al è une monarchie costituzionâl de Americhe setentrionâl. Al è tocjât a Est dal Ocean Atlantic, a Ovest dal Ocean Pacific e dal stât statunitens dal Alaska, a Nord dal Mâr Glaciâl Artic e a Sud dai Stâts Unîts di Americhe. Dopo la Russie, il Canadà al è il secont stât plui vast dal mont. Il so confin cui Stâts Unîts di Americhe (8.893 km[2]) al è il plui lunc dal mont dividint doi stâts. Il Canadà al è formât di dîs provinciis e trê teritoris. La sô capitâl e je Ottawa.
Canadà | |
Informazions | |
Nomenance | Inglês Canada Francês Canada |
Lenghe ufiziâl | inglês, francês |
Capitâl | Ottawa |
Politiche | |
Forme di guvier | Monarchie costituzionâl[1] |
Cjâf dal stât | Charles III Governadôr gjenerâl: Mary Simon |
Cjâf dal guvier | Justin Trudeau |
Indipendence | dal Ream Unît Confederazion: 1 di Lui 1867 Statût di Westminster: 11 di Dicembar 1931 Rimpatri de Costituzion: 17 di Avrîl 1982 |
Gjeografie | |
Continent | Americhe setentrionâl |
Superficie | |
Superficie Totâl | 9.984.670 km2[2] |
% di aghe | 8,92% |
Popolazion | |
Popolazion totâl | 35.151.728[3] ab. |
Economie | |
Monede | Dolar canadês |
Domini di prin nivel | .ca |
Prefìs tel. internazionâl | +1 |
Abitât par milenis di popolazions aborigjenis, il stât al fo colonizât dai francês e inglês sul imprin dal secul XVII dongje de cueste atlantiche. La France e cedè la plui part dai siei teritoris al Ream Unît tal 1763 daspò de sconfite patite intant de Vuere Franco-Indiane, il front nordamerican de Vuere dai Siet Agns. Al 1 di Lui dal 1867 e nassè la confederazion canadese cu l'union de trê coloniis dal Nord Americhe Britanic di Gnove Scozie, Gnûf Brunswick e Provincie dal Canadà, che daspò a deventarin cuatri par vie de division de Provincie dal Canadà in Ontario e Québec. Cul timp si zontarin simpri plui provinciis par formâ il stât nordamerican di vuê.
Il Canadà al è un stât federâl guviernât cuntun sisteme parlamentâr te suaze di une monarchie costituzionâl. Elisabete II e je il so cjâf dal stât. Il prin ministri invezit al è Justin Trudeau, dal Partît Liberâl dal Canadà. Il Canadà al à dôs lenghis uficiâls, ven a dî l'inglês e il francês, e une popolazion di 35 milions cirche. L'economie avanzade dal Canadà e puarte il stât a plaçâsi al decim[4] puest al mont in rivuart al so Prodot interni sporc (PIS) nominâl, par vie che la sô economie si base in mût principâl su lis sôs tantis risorsis naturâls e su lis sôs rêts comerciâls, ben svilupadis, soredut cui Stâts Unîts di Americhe.
Il Canadà al fâs part di numerosis organizazions internazionâls, par esempli il Commonwealth des Nazions (CN), l'Organizazion Internazionâl de Francofonie (OIF), il Grup dai Siet (G7), il Grup dai Vincj (G20), l'Organizazion des Nazions Unidis (ONU), l'Acuardi Nordamerican par il Libar Scambi (NAFTA), l'Organizazion dal Tratât dal Atlantic dal Nord (NATO) e l'Organizazion Mondiâl dal Cumierç (WTO).