Disco
From Wikipedia, the free encyclopedia
Disco (pronuncez: "disko"; Angle: disco music o simple Disco, France discothèque) esas muzikala jenro naskinta de Afrik-Amerikan muziko - nome funk e soul - kun elementi di Latina muziko (precipue salsa), *psikodelika muziko e swing, qua populareskis precipue dum la yari 1970a. Ol aparis e kreskis unesme en Usa, en noktala klubi di la *komunitati geyal, Latin-Amerikana ed Afrik-Amerikana, ma balde divenis populara ank inter la blanki e heterosexuali. La disco-"kulturo" esis anke reakto kontre la dominaco da rock e la stigmatizado da la "kontrekulturo" kontre danso-muziki.
Quankam l'influi da funk, soul, Latina muziko e *psikodelika muziko esas klara, l'uzado di orkestri ed aranjuri de klasika muziko ank esis frequa. L'uzo di orkestri iniciesis dal ateliero Motown Records, en l'urbo Detroit, dum la yari 1960a. Inverse a rock, l'elektrala gitaro rare uzesis en disco-muziko.
La noktala klubi ube eventis dansobali nomesis discotheque en la Angla e discothèque ("diskoteko") en Franca pos la yari 1960a (antee, discotheque signifikis "kolekturo de diski"), nomo qua abreviesis kom disco de pos 1964. Tamen, la vorto disco komencis uzesar erste pos 1972, kande la muzikala kritikisto Vince Aletti skribis l'artiklo "Discotheque Rock '72: Paaaaarty!" por la Usana muzikala revuo Rolling Stone. To esis l'origino di la vorto disco kom nomizuro di la muzikala jenro.