Rossiyanıń Ukrainaǵa basqını (2022)
From Wikipedia, the free encyclopedia
2022-jıl 24-fevralda Rossiya Ukrainaga basqınshılıq hújimin basladı. Basqınshılıq hújimine shekem Rossiya Ukraina shegarası janında uzaq waqıt dawamında ásker toplap, onıń sanın asırıp bardı hám de Ukrainanıń NATOǵa qosılıwın nızam jaǵınan qadaǵan etiw tuwrısındaǵı talap penen shıqtı[1]. Shabıwıl baslanıwınan bir neshe kún aldın Rossiya Doneck Xalıq Respublikası hám Lugansk Xalıq Respublikası ǵárezsizligin tán aldı hám 2022-jıl 21-fevralda Ukraina shıǵısındaǵı Donbass aymaǵına Rossiya qurallı kúshleri bólinbelerin jiberdi.
24-fevral shama menen saat 05:00 EET (UTC+2) de Rossiya prezidenti Vladimir Putin Ukrainanı „denacifikaciya“ hám „demilitarizaciya“ qılıw maqsetinde „arnawlı áskeriy operaciya“ baslanǵanın járiyaladı. Aradan minutlar ótkennen soń, rus áskerleri tárepinen Ukraina aymaǵına hawadan hújimler baslandı. Ukraina shegara xızmeti rus áskerleri Rossiya hám Belarus penen shegara postları arqalı bastırıp kirgenin xabarladı. Kóplegen mámleketler bul basqınshılıq hújimin qaraladı hám Rossiyaǵa qarsı sankciyalar engizdi. Hújimge qarsı global kórinisler bolıp atırǵan bir waqıtta Rossiyadaǵı kórinisler ǵalaballıq qamawǵa alıwlar menen qarsılandı. Shabıwıldan aldın da, shabıwıl dawamında da kóplegen mámleketler Ukrainaǵa qural-jaraq jetkiziw arqalı járdem kórsetti. Buǵan juwap retinde Putin Rossiya yadrolıq kúshlerin tayar jaǵdayǵa keltirdi. BMShniń Qashqınshılar boyınsha Joqarı komissiyalıq maǵlıwmatlarına kóre, 500 mıńnan aslam Ukrainalıq qashqınshı hújimniń dáslepki tórt kúni ishinde mámleketten ketip, Evropa boylap qashqınshılar daǵdarısına sebep bolǵan.