Jugoslábia
From Wikipedia, the free encyclopedia
La Jugoslábia fui un paíç qu'eisistiu na region de ls Bálcanas na Ouropa durante la maior parte de l seclo XX. El surgiu passado la Purmeira Guerra Mundial, an 1918,[1] sob l nome de Reino de ls Sérbios, Croatas i Slobenos atrabeç de la fuson de l probisório Stado de ls Slobenos, Croatas i Sérbios (el própio formado por territórios de l'antigo Ampério Austro-Húngaro) cul Reino de la Sérbia, antes andependiente. La casa rial sérbia de Karađorđeibić tornou-se la dinastie rial iugoslaba. La Iugoslábia ganhou reconhecimiento anternacional an 13 de júlio de 1922 na Cunferéncia de ls Ambaixadores an Paris.[2] L paíç recebiu l nome de ls pobos slabos meridionales i custituiu la sue purmeira ounion, passado seclos an que tales territórios tenien sido parte de l Ampério Otomano i de la Áustria-Hungrie.
Las seis repúblicas socialistas que custituíran l paíç éran la RS de la Bósnia-Heirzegobina, RS de la Croácia, RS de la Macedónia, RS de Montenegro, RS de la Eslobénia i la RS de la Sérbia. La Sérbia cuntenie inda dues porbíncias socialistas outónomas, Bojbodina i Cosobo, que depuis de 1974 éran an grande parte eiguales als outros nembros de la federaçon.[3][4] Depuis dua crise eiquenómica i política na década de 1980 i de l surgimiento de l nacionalismo, la Iugoslábia fui zeintegrada al lhongo de las frunteiras de sues repúblicas, einicialmente an cinco países, lhiebando a la Guerra de la Iugoslábia.
Depuis de la dissoluçon, las repúblicas de la Sérbia i Montenegro formórun ua federaçon reduzida, la República Federal de la Iugoslábia (RFI), qu'aspiraba al statuto de único sucessor lhegal de la RFSI, mas essas rebindicaçones éran negadas pulas outras ex-repúblicas. Eibentualmente, la Sérbia i Montenegro aceitórun l'oupenion de l Comité de Arbitraige de Badinter subre la sucesson cumpartilhada.[5] La própia Sérbia i Montenegro se separórun an 2006 i tornórun-se Stados andependientes, anquanto l Cosobo proclamou la sue andependéncia an 2008.