John Wayne Gacy
From Wikipedia, the free encyclopedia
John Wayne Gacy (* 17. März 1942 in Chicago; † 10. Meu 1994 in Crest Hill, Illinois) was eun US-amerikaansken Serienmöörder un Sexuaalverbreker, deu in den Joren 1972 bet 1978 binnen eune Vöörstad van Chicago teomindsten 33 junge Männer un Teenagers missbriuke, püinige un moorde. Süine Uptrede os „Pogo“ oder „Patches de Clown“, maken enne, os süine Verbreken vöördage keumen, auk os de „Killer-Clown“ bekand.
Gacy begung olle süine Moorde binnen süinen Hiuse in’r Norwood Park Township, eune Vöörstad van Chicago. Meusttüids locke heu de Offers in süin Hius, spille eunen Täuvertrick vöör un beküre de Offers seo Üisens ümme de Hänne anteoleggen. Heu schänne un foltere süine fesseld Offers denn un wörge oder sticke ünen upletst daud. Sessuntwintig Offers verbuddele heu in den Kriupkkeller unner süinen Hiuse, dreu kiule heu up süinen Grundstücke in un veur Offers smeit heu in den Des Plaines River, eunen Streom in’n Westen van Chicago in Illinois.
Gacy was ol süid 1968 wegen Untucht med eunen 15 Jore aulen Teenager vöörbestrafft. Van den teggen Joren Straffe satt heu man eun un eun halve Joor af. Süin eurst Offer moorde heu 1972, hadde 1975 ol tweu annere Offers ümmebrocht un moorde noch teomindsten 30 annere Offers, nodem Gacy un süine tweude Friu sik 1976 schieden hadden. De Soike no den verswunnen Teenager Robert Piest iut Des Plaines, lllinois brochte de Spoor up Gacy, den de Polizei den 21. Dezember 1978 fastnamm.
Gacy worde den 13. März 1980 teo’n Daude veroordeuld. Heu starv den 10. Meu 1994 in den Stateville Correctional Center in Crest Hill, Illinois döör de Giftsprütte.