ზარხულიშ ოლიმპიური ლაჸაფეფი 2020
From Wikipedia, the free encyclopedia
2020 წანაშ ოლიმპიური ლაჸაფეფი (ფრანგ. Jeux Olympiques d'été de 2020, ინგლ. 2020 Summer Olympics, იაპონ. 2020年夏季オリンピック ნისენ ნიძიუ: ნენ კაკი ორიმპიკკუ), ოფიციალურო — XXXII ოლიმპიური ლაჸაფეფი (ფრანგ. Jeux de la XXXIIe olympiade, ინგლ. Games of the XXXII Olympiad, იაპონ. 第三十二回オリンピック競技大会 დაი სანძიუ: ნი-კაი ორიმპიკკუ კიო: გი ტაიკაი), მარკეტინგული ჯოხო — ტოკიო 2020 (ფრანგ. Tokyo 2020, ინგლ. Tokyo 2020, იაპონ. 東京2020 ტო: კიო: ნი-ძერო-ნი-ძერო) — ზარხულიშ XXXII ოლიმპიური ლაჸაფეფი, ნამუთ 2020[1][2] წანას მანჯებედუკო-ოკო იაპონიაშ ნანანოღა ტოკიოს[3], მარა COVID-19-შ პანდემიაშ გეშა ართ წანაშ უკული იმანჯებჷ, ნამუშ გეშა 2020 წანაშ 24 მელახის გჷმაცხადჷ ოერეფოშქაშე ოლიმპიურ კომიტეტიქ. თეწკჷმა ართო, მარკეტინგულ ღანკით ოლიმპიურ ლაჸაფეფს ქჷდასქიდჷ წანაშ აბრევიატურაქ „2020“. თენა მაართა ოლიმპიური ლაჸაფეფი რდჷ, ნამუთ ოგაგანაგე სიტუაციაშ გეშა გინოდვალირქ იჸუნ, დო ვართ გოუქვაფილქჷნ, თაშნეშე მაართა ოლიმპიური ლაჸაფეფი რდჷ ისტორიას, ნამუქჷთ იმანჯჷ გეკულა წანას.
მენძელი | ტოკიო, იაპონია |
---|---|
დევიზი | ემოციეფით აკოკათელი |
მაკათური | 206 (საეგებიოთ) |
სპორტსმენი | 11,326 |
ღონისძიება | 339 სპორტიშ 33 გვარობას (50 დისციპლინა) |
გონწყუმა | 23 კვირკვე, 2021 |
კილუა | 8 მარაშინათუთა, 2021 |
გჷმანწყუმალი |
იმპერატორი ნარუჰიტო |
ოლიმპიური ლაჸაფეფიშ მენძელუაშ გეშა ოფიციალური გჷნაცხადიშ მეღება 2011 წანაშ 1 ეკენიაშა რდჷ. 2012 წანაშ 23 მესის, ოერეფოშქაშე ოლიმპიური კომიტეტიქ გჷმაცხადჷ, ნამჷ-და ოფიციალურ კანდიდატეფო სქიდუდეს მადრიდი, სტამბოლი დო ტოკიო. 2013 წანაშ 7 ეკენიას, ბუენოს-აირესის, ოერეფოშქაშე ოლიმპიური კომიტეტიშ 125-ა სესიას ოლიმპიადაშ ნანანოღა გეგმაცხადჷ.