臺北站
From Wikipedia, the free encyclopedia
臺北車站係臺灣臺北市中正區嘅一個鐵路站,集合臺鐵、臺灣高鐵、臺北捷運同桃園捷運;周邊有臺北轉運站、國光客運臺北車站等公車站。臺北車站喺臺北捷運路網嘅地理中心,喺1891年開張以嚟唔單只係臺北都會區同北臺灣最重要嘅公共交通樞紐,亦都係全臺灣運量最大嘅鐵路車站,每日進出人數至少52萬,長期係台鐵所有車站總運量嘅第一位,總共使用人數全世界排第25名,排喺日本(第1~23名)同埋法國巴黎北站(第24名)後面。
臺北車站由於一開始提供火車(臺鐵)服務,所以又俗稱「臺北火車站」,簡稱「北車」。臺語係「臺北火車頭」(臺灣話:臺北火車頭,臺羅:Tâi-pak Hué-tshia-thâu)或者「臺北車頭」(臺灣話:臺北車頭,臺羅:Tâi-pak Tshia-thâu),捷運上嘅廣播為「台北車站」(臺灣話:臺北車站,臺羅:Tâi-pak Tshia-tsām)。