黃金投資
喺黃金上嘅投資 / From Wikipedia, the free encyclopedia
黃金投資(粵拼:wong4 gam1 tau4 zi1)顧名思義係指用買賣黃金嚟做一種投資:黃金自古就一路畀人類攞嚟整珠寶同雕像等嘅物品,因而有價值;人類對黃金嘅需求會時常有上落,所以黃金嘅價格(金價)亦會不斷噉升升跌跌;噉即係話,投資者可以趁金價低嗰陣入貨,等到金價一升返就賣走手上嘅金,達致賺取利潤。
投資用嘅黃金可以以好多種唔同嘅方式存在。最簡單直接嘅係買賣實體黃金—包括咗金條、金幣、金飾同埋足金金猴等等。除此之外,投資黃金仲可以係透過交易所買賣基金(ETF)、期貨或者期權嚟做。投資者要識得按自己嘅需要嚟決定用邊一種方法做投資。
到咗廿一世紀初,黃金係最受普羅大眾歡迎嘅投資方式之一。好多人面臨通脹嗰陣都會買黃金,諗住噉做可以保值。而唔少人仲會用平均成本法(DCA)—定時定候買少量嘅金,用嚟為將來未雨綢繆。