1993年俄羅斯憲政危機
From Wikipedia, the free encyclopedia
1993年俄羅斯憲政危機係1993年9月21號喺俄羅斯發生嘅一場政治事件。嗰陣時嘅俄羅斯總統鮑里斯·葉利欽解散咗反對佢推動新自由主義改革嘅俄羅斯聯邦國家立法機關──俄羅斯人民代表大會同埋俄羅斯最高蘇維埃,葉利欽咁做係違反當時嘅《俄羅斯聯邦憲法》。當時嘅最高蘇維埃唔肯解散,打算投票彈劾葉利欽,要求當時嘅副總統亞歷山大·弗拉基米羅維奇·魯茨科伊按照憲法宣誓做總統。由9月28號開始,反葉利欽政府嘅群眾喺街上遊行,發生咗流血事件。當時嘅葉利欽仲掌控噉軍隊,決定咗危機嘅結局。之後嗰一個禮拜反葉利欽嘅抗議升級,喺10月2號去到最高潮,而且搞到俄羅斯差啲內戰。喺關鍵時刻,安全部門同埋部隊嘅領導人支持葉利欽,軍隊包圍咗白宮,用埋坦克同大炮去炸白宮,搞到佢差啲冧,不過好成功咁趕走嗮啲議會成員。去到1993年10月5號,對付葉利欽嘅武裝對抗已經潰散。呢十日係自從1917年十月革命以嚟俄羅斯死傷最慘重嘅街頭鬥爭,根據政府嘅估計,有187人死,437人受傷。