Heograpia ti Filipinas
From Wikipedia, the free encyclopedia
Ti Filipinas ket ti maysa a purpuro a mangbukel kadagiti agarup a 7,107 nga isla[5] nga addaan iti dagup a kalawa ti daga iti agarup a 300,000 kuadrado kilometro (115,831 sq mi).[6] Dagiti 11 a kadakkelan nga isla ket aglaon iti 94% iti dagup a kalawa ti daga. Ti kadakkelan kadagitoy nga isla ket ti Luzon iti agarup a 105,000 kuadrado kilometro (40,541 sq mi). Ti sumaruno a kadakkelan nga isla ket ti Mindanao iti agarup a 95,000 kuadrado kilometro (36,680 sq mi). Ti purpuro ket agarup a 800 kilometro (500 mi) manipud iti nangruna a daga ti Asia ken mabirukan iti pagbaetan ti Taiwan ken Borneo.
Heograpia ti Filipinas | |
---|---|
Kontinente | Asia |
Rehion | Abagatan a daya nga Asia |
Nagsasabtan | 13.000°N 122.000°E / 13.000; 122.000 |
Kalawa | Nairanggo a maika-64 |
• Dagup | 300,000 km2 (120,000 sq mi) |
• Daga | 99.38% |
• Danum | 0.62% |
Aplaya | 36,289 km (22,549 mi) |
Dagiti pagbeddengan | Awan |
Kangatuan a punto | Bantay Apo 2,954 metro (9,692 ft) |
Kababaan a punto | Kaadaleman ti Galathea 10,540 metro (34,580 ft) (pantar ti baybay) |
Kaatiddogan a karayan | Karayan Cagayan |
Kadakkelan a danaw | Laguna de Bay |
Ti purpuro ti Filipinas ket nabingbingay kadagiti tallo a grupo ti isla: ti Luzon, Visayas, ken Mindanao. Ti is-isla ti Luzon ket mairaman met ti Luzon, Palawan, Mindoro, Marinduque, Masbate, Romblon, Catanduanes, Batanes ken Polilio. Ti Visayas ket ti grupo dagiti isla iti tengnga a Filipinas, ti kadakkelan kadagitoy ket ti: Panay, Negros, Cebu, Bohol, Leyte, Samar, Siquijor, Biliran ken Guimaras. Ti is-isla ti Mindanao ket mairaman met ti Mindanao, ti Dinagat, Siargao, Camiguin, Samal, ken mainayon ti Purpuro Sulu, a kangrunaan a buklen ti Basilan, Sulu, ken Tawi-Tawi.