మహిళల క్రికెట్ ప్రపంచ కప్
From Wikipedia, the free encyclopedia
ఐసిసి మహిళల క్రికెట్ ప్రపంచ కప్, క్రికెట్లో అత్యంత పురాతనమైన ప్రపంచ ఛాంపియన్షిప్. మొట్టమొదటి టోర్నమెంటు 1973లో ఇంగ్లాండ్లో జరిగింది. ఒక్కో జట్టుకు 50 ఓవర్లుండే వన్డే ఇంటర్నేషనల్ మ్యాచ్లు ఆడారు. ట్వంటీ20 ఇంటర్నేషనల్ క్రికెట్కు విడిగా ఐసిసి మహిళల T20 ప్రపంచ కప్ ఉంది.
ఐసిసి మహిళల క్రికెట్ ప్రపంచ కప్ | |
---|---|
నిర్వాహకుడు | అంతర్జాతీయ క్రికెట్ కౌన్సిల్ |
ఫార్మాట్ | WODI |
తొలి టోర్నమెంటు | 1973 England |
చివరి టోర్నమెంటు | 2022 New Zealand |
తరువాతి టోర్నమెంటు | 2025 India |
జట్ల సంఖ్య | 8 (2029 నుండి 10) |
ప్రస్తుత ఛాంపియన్ | ఆస్ట్రేలియా (7వ టైటిల్) |
అత్యంత విజయవంతమైన వారు | ఆస్ట్రేలియా (7 టైటిళ్ళు) |
అత్యధిక పరుగులు | డెబ్బీ హాక్లీ (1,501) |
అత్యధిక వికెట్లు | ఝులన్ గోస్వామి (43) |
ప్రపంచ కప్ను ప్రస్తుతం అంతర్జాతీయ క్రికెట్ కౌన్సిల్ (ఐసిసి) నిర్వహిస్తోంది. 2005 వరకు, దీన్ని ఇంటర్నేషనల్ ఉమెన్స్ క్రికెట్ కౌన్సిల్ (IWCC) సంస్థ నిర్వహించేది. పురుషుల టోర్నమెంటు మొదలవడానికి రెండు సంవత్సరాల ముందే, 1973 లో, మొదటి మహిళల ప్రపంచ కప్ ఇంగ్లాండ్లో జరిగింది. టోర్నమెంటు మొదలైన తొలి నాళ్ళలో నిధుల సమస్యలు ఎదురయ్యాయి. దీని వలన అనేక జట్లకు పంపిన ఆహ్వానాలను తిరస్కరించాయి. టోర్నమెంట్ల మధ్య ఆరు సంవత్సరాల వరకు అంతరం వచ్చింది. అయితే, 2005 నుండి ప్రపంచ కప్లు నాలుగు సంవత్సరాల వ్యవధిలో నిర్వహిస్తున్నారు.
ఐసిసి మహిళల ఛాంపియన్షిప్లో పోటీ చేసే జట్లు, ప్రపంచ కప్ క్వాలిఫైయర్ ద్వారా అర్హత సాధిస్తాయి. టోర్నమెంటు కూర్పు చాలా సాంప్రదాయకంగా ఉంటుంది - 1997 నుండి టోర్నమెంట్లో కొత్త జట్లు ఏవీ చేరలేదు. 2000 నుండి ప్రపంచ కప్లోని జట్ల సంఖ్య ఎనిమిదిగా నిశ్చయించారు. అయితే టోర్నమెంటును 2029 నుండి 10 జట్లకు విస్తరించనున్నట్లు ఐసిసి 2021 మార్చిలో వెల్లడించింది.[1][2] 1997 ఎడిషన్లో రికార్డు స్థాయిలో పదకొండు జట్లు పోటీపడ్డాయి. ఇదే ఇప్పటి వరకు అత్యధికం.[3]
ఇప్పటి వరకు జరిగిన పదకొండు ప్రపంచ కప్లు ఐదు దేశాల్లో జరిగాయి. భారత్, ఇంగ్లండ్లు చెరి మూడుసార్లు ఆతిథ్యం ఇచ్చాయి. ఆస్ట్రేలియా ఏడు టైటిళ్లను గెలుచుకుని, అత్యంత విజయవంతమైన జట్టుగా నిలిచింది. మూడు సందర్భాల్లో మాత్రమే అది ఫైనల్కు చేరుకోలేకపోయింది. ఇంగ్లండ్ (నాలుగు టైటిళ్లు), న్యూజిలాండ్లు (ఒక టైటిల్) ఈ ఈవెంట్ను గెలుచుకున్న ఇతర జట్లు కాగా, భారత్ రెండుసార్లు, వెస్టిండీస్ ఒకసారి ఫైనల్కు చేరుకున్నాయి గానీ కప్పు గెలవలేదు.