Antroxu de Santa Cruz de Tenerife
From Wikipedia, the free encyclopedia
Plantía:Ficha de fiesta
L'Antroxu de Santa Cruz de Tenerife ostenta, xunto col Antroxu de Cádiz y el Antroxu d'Águiles (Murcia) la máxima considerancia pa fiestes que concede'l ministeriu con competencies en turismu n'España. Ye consideráu'l segundu antroxu más popular y conocíu internacionalmente, dempués de los que se celebren en Rio de Janeiro (Brasil).[1][2][3] De fechu la ciudá de Santa Cruz de Tenerife ta hermanada cola ciudá de Rio de Janeiro por esta razón.[4][5]
Miles de persones salen a la cai cada añu mientres más d'una selmana. El turismu amóntase al par que lo fai pel branu. El 18 de xineru de 1980 foi declaráu Fiesta d'Interés Turísticu Internacional pola Secretaría d'Estáu pal Turismu, siendo la única fiesta canaria qu'ostenta tal distinción. Amás ye unu de los antroxos más importantes del mundu y el de mayor relevancia del país.[6][7] Na actualidá l'Antroxu de Santa Cruz de Tenerife aspira a convertise en Patrimoniu de la Humanidá.[8] Esta declaración per parte de la UNESCO va suponer, de producise, la mayor promoción internacional que tuviera Santa Cruz de Tenerife, por ser el primer Antroxu d'España en llograr esta reconocencia, pol so calter permanente nel tiempu y porque llegaría a los cinco continentes al traviés de la UNESCO. En 1987 allegó al Antroxu Chicharreru la célebre cantante cubana Celia Cruz xunto a la orquesta Billo's Caracas Boys, a la qu'asistieron 250.000 persones, foi rexistrada nel Llibru Guinness de los récores como la mayor congregación de persones nuna plaza al campu p'asistir a un conciertu, marca que se caltién anguaño. Nel añu 2000, l'antroxu de Santa Cruz de Tenerife, dedicáu esi añu a Los Piratas convirtió a la ciudá en Capital Mundial del Antroxu.
Cuenta con dos partes bien estremaes, l'antroxu "oficial" y l'antroxu na cai. L'antroxu oficial cuenta con más de 100 grupos con una media de 50 componentes cada unu: murgues, comparses, grupos d'amarutes, rondallas y agrupaciones musicales. L'antroxu de la cai, vien ser la participación de los mesmos ciudadanos na fiesta.