Benjamin Morrell
esplorador estauxunidense (1795–1839) / From Wikipedia, the free encyclopedia
Benjamin Morrell (5 de xunetu de 1795, Rye (es) – circa 1839) foi un marín y esplorador d'Estaos Xuníos. Ente 1823 y 1831 realizó cuatro viaxes de relevancia, principalmente pol océanu Antárticu, les islles del Pacíficu y les costes orientales d'América. Escribió un llibru de memories sobre los sos viaxes tituláu A Narrative of Four Voyages y, arriendes de les informaciones apurríes nesa obra, ganóse una pésima reputación como fabulador poles inexactitud que contenía y tamién pola forma un tanto falambaldre d'esponer les sos esperiencies. Con posterioridá, demostróse que munchos de los descubrimientos xeográficos sobre los qu'informó nun esistíen, especialmente los realizaos en L'Antártida, siendo'l casu más llamativu la inesistente Nueva Groenlandia del Sur.
Benjamin Morrell | |
---|---|
Vida | |
Nacimientu | Rye (es) , 5 de xunetu de 1795[1] |
Nacionalidá | Estaos Xuníos |
Muerte | 1839[1] (43/44 años) |
Familia | |
Casáu con | Abby Jane Morrell |
Estudios | |
Llingües falaes | inglés[2] |
Oficiu | esplorador |
Morrell tuvo una solmenada carrera qu'empezó cuando s'embarcó per primer vegada a la edá de 16 años. Foi prindáu y encarceláu dos veces polos británicos mientres la guerra ente Reinu Xuníu y Estaos Xuníos de 1812. En siendo lliberáu, saleó dellos años como marineru antes de ser nomáu primer oficial y más tarde capitán del Wasp, un barcu de Nueva York dedicáu a la caza de foques. En 1823, realizó col Wasp un llargu viaxe per agües subantártiques, y foi partir d'esti primer viaxe, d'un total de cuatro, qu'empezó a desenvolvese'l discutiniu sobre la so reputación. Munches de les afirmaciones que fizo, como'l ser el primeru en desembarcar na islla Bouvet y el navegar pol mar de Weddell hasta los 70°S, son bien dudoses. La rápida travesía de 5600 km qu'afirmó realizar por altes llatitúes ye totalmente improbable, y el descubrimientu d'una llarga mariña que llamó Nueva Groenlandia del Sur, dacuando denominada Tierra de Morrell, resultó ser falsu. Los sos trés viaxes siguientes fueron menos polémicos, anque la narración que fizo de dellos incidentes consideróse absurda o simple fantasía.[3] La so falta de fiabilidá viose agravada pola costume que tenía d'atribuyise nos sos rellatos los méritos d'otros.
A pesar de que foi consideráu una torga pa los xeógrafos»,[4] Morrell foi defendíu por escritores ya historiadores que, de la que deploraban l'estilu qu'emplegaba, atoparon esplicaciones pa les sos dudoses reclamaciones y aceptaron qu'en realidá foi honráu no básico. Los sos contemporáneos fueron menos arrogantes con él. Tar reputáu como fabulador complicó los sos intentos por siguir cola so carrera tres la publicación del llibru, y resultó-y cada vez más difícil consiguir emplegu. Créese que morrió en 1839 d'una fiebre contraida en Mozambique,[5] onde recaló al tornar d'un viaxe pol Pacíficu.