James Joyce
irischa Schriftstäia / From Wikipedia, the free encyclopedia
Da James Joyce [ˌdʒeɪmz ˈdʒɔɪs] (* 2. Feba 1882 z Dublin; † 13. Jenna 1941 z Zirich) wor a irischa Dichda und Schriftsteja. Ea guit ois oana vo de wichtigstn Autorn vo da literarischn Modeane. Sei bekanntasdes Weak is da Roman Ulysses. Wegweisende Schrift san aa de Kuazgschichtn Dubliner, da Roman Finnegans Wake und de Novejn A Portrait of the Artist as a Young Man.
Ea is in Dublin afgwoxn und hod do a studiad. Mid 22e is aa af Kontinental-Eiropa ausgwandad und hod voa oim z Triest, Paris und Zirich glebd. Obwoi ea de moaste Zeid vo seim Lem weit wegga vo Dublin glebd hod, hom se seine Gschichtn olle um Dublin bzw. de Leid vo Dublin drahd. Ea hod sejm dazua gschriem: "For myself, I always write about Dublin, because if I can get to the heart of Dublin I can get to the heart of all the cities of the world. In the particular is contained the universal."[1]
Afgrund vo seina speziejn Vazejtechnik gejtn de Schriftn vom James Joyce ois schwaar bzw. gor ned z ibasetzn. Bsondas markant bei eam is de Vawendung vom stream of consciousness ("Gedanknstrom", "innara Monolog"). De Technik hod ea zwor ned eafundn, oba perfektioniad. Des lezde Kapitl vo "Ulysses" bstähd beispuisweis nua aus de Gedankn vo da Marion ("Molly") Bloom, da Frau vo da Haptfigua Leopold Bloome (gschriem ohne Punkt und Komma bzw. ohne irgendwejchane Interpunktionszoachn). Markant is aa de Mischung vo an Haffa literarische Technikn.