Meteorologie
From Wikipedia, the free encyclopedia
La meteorologie ó ciéncia atmosférica ambestiga ls fenómenos de la atmosfera terrestre i de outros planetas, cun foco ne ls porcessos físicos que ambuolben múltiplas scalas i na prebison de l tiempo.[1]
La ourige de la palabra meteorologie ye meteoro que senefica aqueilho que stá eilebado ó cuntido na atmosfera.
La pesquisa científica de la atmosfera i las sue aplicaçones defínen l ouniberso i la abrangéncia de la meteorologie. Un de ls percipales oubjetibos ouparacionales de la meteorologie ye la prebison de l tiempo, antendida eiqui cumo la prebison de l fenómenos atmosféricos que acuntecírun nun período feturo de até 15 dies. Para alhá de la prebison de l tiempo hai la detreminaçon de la tendéncia de las flutuaçones climáticas, an giral referida solo cumo tendéncia climática. Nesse causo, la tendéncia percura stabelecer las cundiçones de las flutuaçones climáticas de l próssimo anho ó de la próssima staçon, se la temperatura, ounidade de l tierra, precipitaçon etc stará arriba, ambaixo ó próssima de l balor sperado. Assi, la prebison de l tiempo ye defenida para defrentes scalas temporales i spaciales. Muitos de ls sistemas atmosféricos aperséntan ua cumbinaçon cumplexa de fenómenos de scalas defrentes.
Las prebisones de ls fenómenos de l tiempo local, percipalmente daqueilhes fenómenos associados al tiempo sebero, cumo tempestades, airaçadas, rajadas, pancada de chuba, granizo, etc son mui amportantes para ua basta gama de atebidades houmanas i pa l antendimiento de las trasformaçones rápidas de l ambiente. Por eisemplo, nas grandes cidades ls fenómenos meteorológicos más críticos acaban por definir las cundiçones de salubridade i la culidadeambiental la qual stá sujeita la populaçon. Antre esses fenómenos listan-se las einundaçones, las stiaiges i la çponiblidade de auga potable, las cundiçones críticas de temperaturas stremas (óndias de calor ó canicules), an giral associadas la baixos balores de houmidade relatiba de l aire, ls eibentos críticos de poluiçon de l aire, associados a la cuncentraçones de poluentes atmosféricos arriba de balores aceitables a la salude houmana, animal i begetal, etc. La populaçon mundial de las cidades ten hoije ua percepçon crecente quanto la sue bulnerablidade als riscos ambientales.
La atmosfera ye un de ls cumponentes de l chamado Sistema Ambiental de l Planeta, de l qual tamien partecípan l Ouceano, la Superfice planetária an giral (tierras, peinhas etc) i l cunjunto de ls seres bibos, para definir ua sistema caratelizado por ua cumplexa rede de anter-relaçones i feedbacks (porcessos de retro-alimentaçon positiba i negatiba). La Meteorologie studa la atmosfera an sue anter-relaçon culas outras sferas de l planeta: la biosfera, litosfera, criosfera i heidrosfera.
La camada atmosférica an que la maiorie de ls seres bibos de la tierra i de l aire bíben ye chamada tamien houmeosfera, porque neilha la cumbeçon térmica i la turbuléncia, ancuntrada na troposfera homogeneizan las fraçones an belume de ls gases atmosféricos, percipalmente nitrogénio (tamien chamado azoto) i oxigénio.
La atmosfera terrestre ye çtinta de outras ne l sistema solar, por ua lado, pula persença de cantidades seneficatibas de oupor de auga i de oxigénio i por outro, pula falta de eiquilíbrio químico antre ls cumpuostos químicos na atmosfera. mui an funçon de las reaçones bioquímicas. Cumo eisemplo, l ouxigénio de la atmosfera terrestre nun stá an eiquilíbrio químico culs outros materiales de la superfice terrestre cumo acuntece an Marte. Esso se debe la persença de bida begetal na Tierra. De forma defrente an Marte praticamente todo l ouxigénio çponible na atmosfera fui outelizado na oxidaçon de ls cumpuostos de la superfice ariana, dende a quelor abermelhada de sue superfíce i tamien l que ye spantoso, la falta de formas de bida macroscópicas ó que séian facilmente eidantificables por sensoriamiento remoto.