Evapotranspiracion
From Wikipedia, the free encyclopedia
L'evapotranspiracion (ET) es la soma de l'evaporacion e la transpiracion vegetala dempuèi la superfícia del sol cap l'Atmosfèra terrèstra. L'evapotranspiracion es una partida importanta del cicle de l'aiga.[1] L'evapotranspiracion potenciala (ETP) es la representacion de la demanda del mitan en evapotranspiracion e representa lo taus d'evapotranspiracion d'una vegetacion densa baissa, omogenèa e amb sufisentament d'aiga per que se limite pas la seuna creissença, es a dire que cobrís completament lo sol, amb un pes unifòrme e sufisentament provesida d'aiga (un exemple seriá un camp de lusèrna asagada o dins un clima pro umid de contunh per l'an). Rebat l'energia disponibla per evaporar l'aiga e lo vent disponible per transportar la vapor d'aiga dempuèi la tèrra fins a las jaças baissas de l'atmosfèra. L'evapotranspiracion reala es la meteissa que l'evapotranspiracion potenciala quand i a pro d'aiga. Al contrari s'i a secada l'evapotranspiracion reala será inferiora a la potenciala, per que es impossible d'evaporar l'aiga qu'es pas disponibla. La mejana annadièra d'ETP es sovent comparada amb la mejana annadièra de las precipitacions, P. La ralacion entre las doas, P/ETP, es l'indici d'ariditat. La diferéncia entre ETP e precipitacion, publicadas pels organismes oficials, s'utiliza per programar l'asagatge.