Mga Peranakan
From Wikipedia, the free encyclopedia
Ang mga Peranakan ( /pəˈrɑːnəˌkɑːn,_ʔkən/) ay isang pangkat etniko na tinutukoy ng kanilang pinagmulang angkan mula sa unang bugso ng mga dayuhan mula sa Timog Tsina patungo sa maritimong Timog-silangang Asya, kilala bilang Nanyang (Tsino: 南洋; pinyin: nán yáng; lit.: "Timugang Karagatan"), yaon ay, ang mga daungang pinamumunuan ng mga Briton sa Tangway ng Malaya, Kapuluang Indonesia pati na rin ang Singapore.[4][5] Kilala ang kulturang Peranakan, lalo na sa mga sentro ng Peranakan: Malacca, Singapore, Penang at Medan, sa natatanging paghahalo ng sinaunang kultura ng Tsina sa mga lokal na kultura ng rehiyong Nusantara. Bunga ito ng siglu-siglong kasaysayan ng transkulturasyon at pag-aasawa ng magkaibang lahi.
峇峇娘惹 Baba Nyonya | |
---|---|
Kabuuang populasyon | |
8,000,000+ (tinatantiya)[1] | |
Mga rehiyong may malaking bilang nila | |
Indonesia, Malaysia, Singapore,[2] Timog Thailand[3] | |
Relihiyon | |
Budismong Mahayana, Kristiyanismo, Confucianismo, Taoismo, Sunismo |
Mga Peranakan | |||||||||||
---|---|---|---|---|---|---|---|---|---|---|---|
Pangalang Tsino | |||||||||||
Tsino | 峇峇娘惹 | ||||||||||
| |||||||||||
Pangalang Malay | |||||||||||
Malay | Peranakan / Tionghoa-Selat / Kiau-Seng | ||||||||||
Dumagsa ang mga imigrante mula sa timugang lalawigan ng Tsina sa rehiyon sa pagitan ng ika-14 at ika-17 siglo, at nanirahan sa Kapuluang Malay (kung saan tinatawag na Baba–Nyonya ang kanilang mga inapo sa Malacca, Singapore at Penang); Kapuluang Indonesia (kung saan tinatawag na Kiau–Seng ang kanilang mga inapo);[6] at Timog Thailand, lalo na sa Phuket, Trang, Phang Nga, Takaupa at Ranong.[7][8] Nakatulong ang pag-aasawa ng mga Tsinong nakipamayan at Malay, Thai, Javanese o ibang hinalinhan sa rehiyon sa paglitaw ng katangi-tanging kulturang mestiso at lantarang pagkakaiba sa penotipo.[9][10]
Kinokonsiderang multirasyal na komunidad ang mga Peranakan, kasama ang paunawa na nagkakaiba ang mga kasaysayan ng bawat pamilya at iba-iba rin ang pakikiisa sa multirasyalismo kaysa sa pagiging Tsino.[10][11] Binubuod ng pariralang Malay/Indones na "orang Cina bukan Cina" ("isang Tsinong hindi Tsino")[12] ang kumplikadong kaugnayan ng pagkakakilanlang Peranakan at pagkakakilanlang Tsino. Mga partikularidad ng talaangkanan at kakaibang magkakahalong kultura ang mga pangunahing tampok na nagbubukod ng mga Peranakan mula sa mga inapo ng mga kalaunang pagdagsa ng mga Tsinong imigrante sa rehiyon.