Búlgaría
land í Suðaustur-Evrópu / From Wikipedia, the free encyclopedia
Búlgaría (búlgarska: България Bălgarija), formlega Lýðveldið Búlgaría (Република България Republika Bălgarija) er land í Suðaustur-Evrópu við strönd Svartahafs. Búlgaría nær yfir megnið af austurhluta Balkanskaga og á landamæri að Rúmeníu í norðri, Serbíu og Norður-Makedóníu í vestri, og Grikklandi og Tyrklandi í suðri. Búlgaría er rúmlega 110 þúsund km2 að stærð og er 16. stærsta Evrópulandið. Höfuðborg Búlgaríu og stærsta borgin heitir Sófía, en aðrar helstu borgir eru Plovdiv, Varna og Burgas.
Lýðveldið Búlgaría | |
Република България Republika Bălgarija | |
Fáni | Skjaldarmerki |
Þjóðsöngur: Mila Rodino | |
Höfuðborg | Sófía |
Opinbert tungumál | búlgarska |
Stjórnarfar | Lýðveldi |
Forseti | Rumen Radev (Румен Радев) |
Forsætisráðherra | Dimitar Glavchev (Димитър Главчев) |
Evrópusambandsaðild | 2007 |
Flatarmál • Samtals • Vatn (%) |
102. sæti 110.994 km² 2,16 |
Mannfjöldi • Samtals (2023) • Þéttleiki byggðar |
106. sæti 6,447,710 66/km² |
VLF (KMJ) | áætl. 2023 |
• Samtals | 174 millj. dala (73. sæti) |
• Á mann | 25.471 dalir (55. sæti) |
VÞL (2019) | 0,816 (56. sæti) |
Gjaldmiðill | Búlgarskt lef (BGN) |
Tímabelti | UTC+2 (UTC+3 á sumrin) |
Þjóðarlén | .bg |
Landsnúmer | ++359 |
Skipuleg samfélög þróuðust í Búlgaríu á Nýsteinöld. Þrakverjar og síðan Grikkir og Rómverjar ríktu yfir landinu í fornöld. Búlgarir réðust yfir Dóná árið 670 og stofnuðu Fyrsta búlgarska ríkið árið 681. Búlgarir tóku þá upp slavneskt mál íbúa landsins sem þeir lögðu undir sig og á 9. öld varð kristni að ríkistrú. Austrómverska ríkið lagði þetta ríki undir sig árið 1018. Annað búlgarska ríkið var stofnað 1185 en Tyrkjaveldi lagði það undir sig árið 1393. Tyrkir féllust á stofnun sérstaks furstadæmis í kjölfar Krímstríðsins árið 1878. Furstadæmið lýsti yfir stofnun sjálfstæðs ríkis árið 1908. Í Fyrri heimsstyrjöld var Búlgaría í liði með Miðveldunum og í Síðari heimsstyrjöld með Öxulveldunum. Sovétmenn gerðu innrás í landið 1944 og settu þar upp leppstjórn kommúnista. Eftir stríð varð Búlgaría því hluti af Austurblokkinni. Eftir hrun Járntjaldsins 1989 var flokksræði afnumið og ný stjórnarskrá samþykkt árið 1991. Eftir 2001 hefur efnahagslíf landsins blómstrað. Það gerðist aðili að Atlantshafsbandalaginu árið 2004 og Evrópusambandinu árið 2007.
Á Sovéttímanum var Búlgaría iðnvædd með áherslu á þungaiðnað og efnahagslíf landsins byggist enn á þungaiðnaði, raforkuframleiðslu, námavinnslu og vélsmíði. Landbúnaður og ferðaþjónusta eru líka mikilvægar atvinnugreinar. Levið er fest við evruna en Búlgaría er ekki hluti af evrusvæðinu og hefur hætt við fyrirætlanir um upptöku evrunnar. Þrátt fyrir vöxt undanfarin ár eru laun í Búlgaríu með því lægsta sem gerist í Evrópu og Búlgaría er í 56. sæti vísitölu um þróun lífsgæða. Spilling er stórt vandamál í landinu sem var talið spilltasta Evrópusambandslandið árið 2018.[1] Landið glímir auk þess við vandamál tengd fólksfækkun. Íbúar þar eru nú tæpar 7 milljónir en voru 9 milljónir árið 1988. Búlgaría er stofnaðili að Öryggis- og samvinnustofnun Evrópu og hefur þrisvar setið í öryggisráði Sameinuðu þjóðanna.