Hokusai
japanischa Ukiyo-e-Kinstla / From Wikipedia, the free encyclopedia
Katsushika Hokusai (jap. 葛飾 北斎, Katsushika Hokusai; * woarscheinl. am 31. Oktoba 1760 z Warigesui, Honjo, Edo (heit: Tokio); † 10. Mai 1849 z Henjōin, Shōten-chō, Asakusa), bekannt ois Hokusai (北斎), wor a japanischa Mola und Grafika. Ea wor oana vo de berihmtasdn Vatreta von da sognenndn Ukiyo-e Stuirichtung (prägd vom neien Biagadum in da Koasazeid; Motto "Leb Hiazd"). Ob 1800 hod a seine Weake ois Gakyōjin, « Narrischa Grafika », signiad.
Nochm Doud vo seim Moasta Shunshō, anno 1793, is a af Wandaschoft ganga.[1] Ea is 90 moi umzong, hod 30 moi sein Nama gendad und hod aa dauand seine Leara und Schuin gwexld. So hod a laffend dazuagleant und si perfektioniad. Nembei hod a aa no Romane gschriem und sejm illustriad. Aa wiar a duach sei Kunst reich worn is, hod a in groussa Oafochheid und Bscheidnheid glebt. An seim Doudnbett soi ea gsogt hom:
- „Hädad da Himme mia finf weidane Joar gschenkt, waar I a groussa Mola worn.“
Da Hokusai wead aa ois Urvoda vom Manga ogsegn[2]. De Hokusai Manga san Skizzn, wo in 15 Bändn easchiena san und wo Momentafnahma ausm Oidogslem vo seina Zeid wiedagem. Ea woa aa a Moasta vo da erotischn Kunst. De moastn Shunga, so wean sejchane Molarein in Japan gnennd, vom Hokusai san Hoizschnitt.[3] Ned nua Mona a Weiwaleid hom a de Shunga eana Freid ghobd.
Des berimtasde Weak vom Hokusai is de Serie „36 Osichtn vom Beag Fuji“. A Buidl aus dera Serie, De grousse Wejn voa Kanagawa, deafad des wejdweit bekanntaste japanische Kunstweak sei. Da Mathematika Benoît Mandelbrot hod zoagt, dass da Hokusai aa scho midm fraktaln Aspekt vo da Natua gspuid hod (vgl. as Kraisln vo da groussn Wejn).
Sei Weak hod aa an groussn Einfluss af an Haffa europäische Mola ghobt, wia beispuisweis af van Gogh, de Impressionistn, Egon Schiele und Gustav Klimt. Aa da Jugendstui, bsondas des Jugenstuigrafik, is davo stoark beeinflussd worn. Weake, de wo vo japanischa Kunst inspirad san, nennd ma aa Japonismus.